今日係2006年最後一日，先向各位朋友講句：「新年進步」

回顧一年，真係好好好好忙，由呢個日記就知，其實最近都好多事發生，例如：4日之內睇兩次醫生﹙我咁孤寒都睇，可想而知我病得幾嚴重﹚；終於都過左一個可以真正休息既x'mas﹙可惜得兩日一夜﹚；經歷地震﹙真係震得好犀利﹚；連續幾晚發高燒﹙差dd令到自己shot shot地﹚；迪迪差0的唔見左﹙因為佢唔出聲匿埋左﹚......多到自己都唔記得。

不過，今年的確係變動多既一年，轉新工、返學......我都唔知而家行緊呢條路係唔係最好，只係有人同我講我錯過左一條較平坦既路，但係就選擇左一條令自己開心既路。坦白講，我的確係選擇左一條辛苦既路，但係我真係開心，因為即使向唔順意既時候，會感覺到有無比既支持同鼓勵，而且我會適應改變，仲嘗試改變。總之一句，辛苦命!

展望新一年，我希望身邊既人個個身體健康，生活愉快，自己可以讀完master，同迪迪一齊住......

由上一篇到現在，其實有好多0野想講，好多0野想發表。我唔係一個習慣寫日記既人，因為我冇恒心，而且有時冇特別事發生，拖下拖下就唔會寫。雖然我開左呢個xanga唔係好耐，只有一年多，而且唔係成日update，但係已經算係最有恒心既一次.....

做左決定到而家，一直都有變化，一直都有考慮、再考慮，我成日都問自己：「有冇做錯？有冇選擇錯？」初初我自己都唔肯定，因為我自己都已經冇信心，仲覺得自己係好唔0岩，好想好想逃避，即使唔開心、想喊都唔敢，仲好憎我自己，我有諗過如果可以消失一陣、一段時間會好DD，攪到自己好似思覺失調.....但當隨住越來越多人問同一個問題、個個都覺得我係錯既時候，反而我就越堅定。唔係因為我自己「硬頸」，而係呢件事並唔係呢幾個月先至諗，我既「老死」一定會知道我已經諗左好耐、好多，所以呢個決定並唔係一時衝動，我只係覺得我冇心思熟慮到涉及既範圍有幾多、有幾深......我知道「傷害」既感覺，但係勉強又係唔係一件好事？可能都係timing問題。不過，要絕對絕對絕對強調一點，由始至終，我都係認真，真心去付出，努力去維繫，但係，有冇人知道努力同堅持既背後唔開心左幾多次、嬲過幾多次？而且，而家確實唔係一個好既timing，我都明白現況同後果，所以而家所承受既，就正正係「報應」。

剛剛仲要俾人閙多一次，又係閙我做錯......唉......係唔係要而家即刻話：「CUT！再黎過」？如果係，又係冇得選擇，又係對我唔公平......全部人都開心，得自己一個最唔開心，係唔係就係做得最好？做得最0岩？如果係，我都諗唔到自己生存既目的......可能就係只係為左「我為人人」......或係講大話、0厄人......

而家受傷害仲有迪迪......我真係好憎好憎好憎好憎我自己......

要好好學習!!